Thursday, September 01, 2005

..القصة مش طقس...يا صديقي


هناك... عند ذلك الخط الفاصل وقفنا.. و ما عرفنا إن كنا يوما قد عبرناه.. أو كان يوما قد عبرنا000

************

سامعة صوت النقط و هي نازلة ترف عالعربية.. أنا مقفلاها و متكلفتة بالكوفية و السويتر و مستنياك.. على طول لازم تتأخر.. بس مش مشكلة.. المهم إنك بتيجي في الآخر.. رنتلك كذا مرة و إنت بتكنسلني.. أكيد في السكة..تعالى بسرعة عشان بجد المرة دي محتاجاك قوي00

شوية و جيت.. فتحت شباكك و ضحكتلي "يا بنتي إنتي مش عارفة إني واخد أجازتي؟! جايباني على ملا وشي الساعة 9 الصبح ليه بقى إن شاء الله؟!".. عارفة إني قلقتك.. بس ما باليد حيلة.. لو مكنتش إتكلمت معاك حالا كنت أكيد هتجنن.."إنزل بس.." قفلنا العربيات و دخلنا الكافيه.. طلبنا النسكافيه المتين بتاعنا00
"ها بقى.. بجد خضيتيني.. في إيه!؟"-
".........."-
"يا بنتي إتكلمي.. بجد أنا قلقت.. في إيه!؟"-
"..فاكر وليد إللي معايا في الشغل؟ اللي كنت حكيتلك عليه قبل كده ده" -
"..أيوة أيوة .. اللي كان بيعمل حركات عليكي بقى له فترة ده.. هه!؟"
و بتغمزلي00
"..آه هو"-
.."ماله!؟"-
".. يعني.. قال لي إمبارح إنه معجب بيا و كده.. و إنه عاوز يتقدم.."-
"......"-
..."سكت ليه!؟"-
"..بفكر"-
طول عمرنا بنفكر مع بعض.. هو ممكن مش عمرنا عمرنا يعني.. بس أنا مش عارفة ليه دايما بحس إننا كنا نعرف بعض على طول.. مع أننا متقابلناش غير من ست سنين.. لسه فاكرة أول مرة إتقابلنا فيها.. كنت لسة في الكلية و جاية أتمرن في الجرنال بتاعكو.. كنت ضاربة لخمة أول يوم و أما المدير أحرجني و قالي "بقى فيه صحفية ميبقاش معاها قلم؟".. من غير حتى ما تكون تعرفني جيت أنقذتني و قلت لي قدامه.. "معلهش أنا نسيت أرجعلك قلمك.." عارف إني لسة محتفظة بالقلم ده؟!.. ما هو سبب تعارفنا السعيد.. و كمان00
إنتي عايزة توافقي؟!".. قطعت حبل أفكاري بكلامك و بالسيجارة اللي ولعتها.. عارفة إنك مبتشربش إلا أما تتوتر00"
"..إبتسمت لك "ما هو أنا لو عارفة أنا عايزة إيه مكنتش جيتلك
"..ضحكت ضحكة متوترة: "حاسس إن أنا اللي هتجوز مش إنتي..
"..ماحنا طول عمرنا واحد"-
.. صحيح.. طول عمرنا واحد.. مع إنك أكبر مني بست سنين.. بس على طول كنت أحس و أنا بكلمك إني بكلم نفسي بس بصوت عالي000
..
*"..ترجع لي كل ما الدني بدّا تعتّم ... متل الهوا اللي مبلّش عالخفيف"*
..
" إيييييه.. يا حاجة.. رحتي فين!؟"

"..لأ مارحتش ولا حاجة"
"طب قوليلي .. إيه رأيك فيه؟"
..يعني.. هو ابن ناس و محترم.. و باينه بيحبني ولا إيه".. ضحكة عصبية"
.."و بتضحكي على إيه؟.. هو غريبة إن حد يحبك ولا إيه!؟"
"..تسدق والله مستغرباها فعلا"
"..مانتي أصلك هبلة"


أول مرة أحس بالحيرة دي كلها.. وليد شاب ممتاز.. بس هو مش صديقي من ست سنين.. هو مش عارف أنهي أغنية بحبها لفيروز.. هو مش هيلبس معايا أسود يوم الفالنتين كنوع من الإحتجاج الصامت على البهرجة الزيادة لليوم ده.. هو مش هيجبلي كلابظات الملاكمة هدية في عيد ميلادي و يكتبلي عليهم
"To My Best Friend Ever"
هو مش عارف باخد كام معلقة سكر عالنسكافيه.. هو ميعرفش إن المانجة بتجيبلي حساسية و إني بموت في الشوكولاتة مع إنها بتطلعلي
حبوب00
"-
ما هو بصراحة بقى أنا لازم أتجوز.. أنا بقى عندي 25 سنة و ماما مبتعديش فرصة إلا و تأنبني.. و أنا بصراحة طول
عمري نفسي أخلف.. بعدين هو بيحبني و شاري"00
".. بصيتلي بصة مندهشة قوي كدة.."طب يا عم الحاج أنا اتكلمت؟.. أنا عايز أعرف رأيِك بس..
".. إرتبكت.."مانا قلتلك أهو..
.."يعني خلاص هتتنازلي عن حلم الجواز عن حب ملتهب!؟"..
"..و أتنازل ليه؟ ماهو بيحبني أهوه"-
.."و إنتي!؟"-
"..أنا؟ بكرة أحبه مدام هيبقى كويس معايا"-
إبتسمت لي ساعتها الإبتسامة اللي كنت كل ما أشوفها أحس ان الدنيا تمام التمام و مفيش حاجة ممكن تأذيني.. "خلاص يا أستاذة.. إنتي كدة
..made up your mind
إنتي عارفة إني باثق في رأيِك و طريقة تفكيرِك.. لو حاسة إن هو ده البني آدم اللي هيسعدك بجد.. دوسي.. لو لأ..فأنا برضه واثق إنك هتاخدي القرار الصح"00
لو حاسة؟! أنا حاسة إن وأنا معاك بابقى أسعد ما يمكن.. بس عارف؟ مينفعش.. مينفعش نفضل صحاب طول العمر.. لازم أتجوز.. و انت كمان بكرة تلاقي بنت الحلال.. سُنة الحياة زي ما قالولي.. و الحياة تنازلات.. تتنازل عن حاجة صغيرة عشان حاجة كبيرة.. الفكرة إن أنا شايفة أي حاجة أصغر "مننا".. و ده زي ما صحابي بيقولولي هيوقفلي حياتي.. كلهم اتجوزا و خلفوا.. و وليد بالنسبة لي فرصة متتعوضش.. فرصة مش أكتر.. مش عارفة أنت فاهم الكلام ده كله ولا لأ.. بس أكيد فاهمه.. أنت مرايتي زي ما كنا بنقول:)00
"شكلها كده هترسى على [موافقون]00"-
" ..أنا واثق فيكي و في رأيك"-
...

سكتنا احنا الاتنين.. و اتكلم صوت فيروز: *"بس هلأ مابتذكّر شكل وجّك .."*00

"..بس إوعي في يوم تنسيني"-
..مقدرتش ساعتها أحوش دموعي..
"..أنا أصلا مش هتجوز من غيرك..لازم تبقى من الشهود كمان"-
"..و إوعي تنسي تعزميني على سبوع إبنك الأولاني"-
و إنت كمان إوعى تنسى توريني الغلبانة اللي هتاخدك قبل مالفاس تقع"-
"..في الراس
ضحكنا و ساعتها جه التشيك.. دفعته و قلنا نمشي ساعتها بقى.. و إحنا عالباب بصيتلي قوي.."إنتي هاتبقي عروسة زي القمر.. و أنا أول واحد يتبعت له دعوة الفرح..فاهمة؟".. أبتسمت لك و مديت إيدي أسلم.. عارفة إني هشوفك تاني بس مليت عيني منك قوي قبل ما أمشي00

*..."بس باذكُر قديش كان أليف.."*

"سلام"-
.."سلام"..-
.. و طلعنا برة و أنا حاسة إن الدنيا بقت برد أكتر و إن المطرة زادت أكتر

30 comments:

taty said...

جميل احساسك يا نور بس ليه النهايه الحزينه؟؟
*bosbos*

KING TOOOT said...

نور
طبعا ً ممتازة و مليانه أحساس و مشاعر رقيقه بس مش منطقية
يعنى طيب ليه ماتتجوزيهوش و تخلصى مادام انتى عندك نية الجواز و هو كمان عنده نفس النية يبقى ليه ما تتجوزوش بعض
عند يعنى و السلام
بتعندوا مع نفسيكم
أهنيكى و أعزيكى
KING TOOOT

Nour said...

بُسبُس

ميرسي على مجاملتك..و النهاية دي في رأيي هي المنطقية.. يمكن مش الأكثر رومانسية بس هي المنطقية

عم توت بقى :)

تعزيني ليه بس يا أستاذنا..حرام عليك تفول عليا :))

دي قصة متخيلة تماما.. بس أحداثها ممكن تكون بتحصل دايما..

و لو ركزت يا كينج في العنوان و أول سطرين.. هتلاقي الموضوع منطقي جدا

تحياتي و متبقاش تغيب عليا قوي كده :)

Haitham said...

لا اعتقد إن للرومانسية مكان في حياتنا دلوقتي ..وعموما بكرة يعرف كام معلقة سكر ويعرف المانجو والشيكولاتة وكل حاجة .. هاه أهم حاجة التفكير بالعقل فعلا الرومانسية جميلة بس بتخدر العقل

Aladdin said...

رائعة يا نور.. إحساسك راقٍ فعلاً على فكرة أنا عاجبني اوي فكرة "المونتاج" دي في القصة التي بتقوم بيها أغاني فيروز الساحرة. تتحدثين - هكذا فهمت - عن ذلك الخيط الرفيع بين الصداقة والحب، عن الفرق الجميل والمؤلم - في آنٍ واحد - بين الزواج من شخص كان صديقاً لك، وبين زواج "الصالونات". أتفق معك بأن النهاية منطقية وطبيعية وأي حاجة تانية كانت هاتبقى "فيلم عربي" بالمعنى الرديء للكلمة!

سؤال، لم لا تتحول علاقة الصداقة في بلدنا المحروسة إلى علاقة حب تتوج بالزواج؟ هل لأن "الصديق" لا يرغب في ذلك التحول أم أن "العريس" اللي هايتقدم عريس "جاهز" بينما "الصديق" ليس كذلك؟!

sheryos said...

يا سلام يانور...
فكرتينى باللى حصل زمان...
بس مكانش وليد , و مش نفس الحوار بالظبط, بس نفس النهاية...
مع انى مش بحب النسكافيه !

Eve said...

يزعجني هذا النّوع من الأشخاص (الصّديق التّخيّليّ). أشعر أنّهم لا يملكون إرادة قويّة، وخوفهم من الارتباط والمستقبل زائد عن حدّه. لعلّهم يملكون ظروفهم الخاصّة، ولكنّهم يسبّبون لكِ ألماً لا يضمحل أبداً. فلا تستطيعين لا كرههم لأنّهم تعمّدوا إيذاءك، ولا حتّى نسيانهم تماماً.

في النهاية، البوست جميل طبعاً كما عوّدتنا، والأغنية رائعة، من أغنياتي المفضّلة لفيروز :-)

KING TOOOT said...

نور
أولا ً آسف على الغياب بس مش بأيدى صدقينى ,, معلش خليها عليكى المره دى
شوفى بقى يا ستى
الخط الفاصل ده هو أللى مش منطقى ,, يعنى الخط ده مين حاطه و ليه محطوط و أيه لزومة أنه يكون موجود أصلا ً ,, لو هى أللى حاطاه يبقى حاطاه بمناسبة أيه ? مادامت بتحبة ,, غاوية عذاب يعنى ؟؟ عندها شيزوفرينيا ؟؟ بتضحك على نفسها و هى من جواها مابتحبوش ولا حاجة ؟؟ كل سؤال من دول أجابته فى كلامك لا
طيب مادام لا يبقى مش هى أللى حاطاه
يبقى هو
طيب هو حاطه ليه ,, مابيحبهاش زى ما هى بتحبة و مجرد بيتسلى بيها ؟؟ لا
طيب متجوز واحده تانية ؟؟ لا
طيب عنده مشاكل مادية تمنعه ؟؟ لا
طيب يبقى حاطط الخط الفاصل ده ليه ؟؟ المشاعر يا نور بحر و أمواج قوية جدا ً مستحيل الأنسان يقدر يقاومها الا لو هى من نفسها كانت ضعيفه
بصراحة القصة جميله و لمست وجدان و مشاعر كل أنسان بيقرأها ,, لكن ما أخبيش عليكى مالمستش عقلى خالص
مش راضيه تركب فى الدماغ دى ,, أعمل أيه ؟
حبيبى أنت و أنا بنحب بعض
طاب ليه بيفضل بيننا الحب و عد
ما دمنا ممكن نكون أقرب كتير
ليه بس نبعد و نرفض نكون لبعض
و عـجـبـى
KING TOOOT

Nerro said...

يتهيألي ممكن صداقات كتير تنتهي بجواز...الفكرة لبقديمة عن ان الصديقة حاجة و الجواز حاجة تانية..ابتدت تنقرض. جميلة يا نور

Nour said...

كل دي تعليقات ما شاء الله..هه إستعنا عالشقا بالله :)))

haitham,
ليه بس اليأس ده؟؟ أنا عامة قربت أوصل لليأس برضه

بس بيتهيألي إن طول ما في ناس بتحب طول ما فيه رومانسية.. يمكن إحنا حظنا موقعناش في ناس منهم بس هما أكيد موجودين..

aladdin,
يا فاهمني إنت :))))

ده كان قصدي بالظبط أما كتبتها.. بالنسبة لسؤالك بقى..فكل علاقة و ليها ظروفها زي ما قلتلك .. بس أنا في رأيي الخاص إن البنت اللي تبقى ليها صديق -بالمعنى العميق للكلمة- من الجنس الآخر ماظنش انها تكون بتفكر بطريقة العريس الجاهز و كده.. ما كانت ابدى تضيع وقتها مع حد جاهز بقى مش صداقة و حاجات مش جايبة همها (من وجهة نظر تلك النوعية بالطبع)

أنا بظن أن المتسبب الرئيسي فى عدم تتويج العلاقات دي بالزواج (و عجبني على فكرة عدم استخدامك لكلمة "انتهاء" اللي كل الناس بقوا يستخدموها دلوقتي)هو بشكل رئيسي الولد.. للأسف في مجتمعنا معظم الرجال ممكن يقبلوا بواحدة دماغها حلوة و شخصية كويسة كصديقة..لكن ييجوا عند الجواز و يقفوا.. و كأنها ليست كائنا جديرا بالزواج.. مش هاقول كل الرجالة.. بس محدش يقدر ينكر إن دي شريحة كبيرة قوي منهم..

بس عارف يا علاء.. أنا في القصة دي سبتها مفتوحة يعني مطلعتش مين فيهم الغلطان أو مين المتسبب في البعد.. يعني عشان كل واحد يبقى عنده تاويل مختلف للقصة.. و دي حاجة صحية بيتهيألي :)))

(بس منكرش إني كنت متعاطفة مع البنت بصراحة):PP

sheryos,
سدقني مش إنت لوحدك اللي صادفت نفس النهاية.. كتير غيرك كمان..

Eve,
حبيبة قلبي :))
كلامك حقيقي جدا و جايب من الآخر في الموضوع ده.. و دي برضة من "فيروزياتي" المفضلة برضه.."تنزكر بالخريف" لمن لا يعرفها..

King Toot,
شوف كده ردي على علاء و هتفهم قصدي إيه..

Nerro,
يا ريت يا نرمو يكون كلامك صح.. حقيقي أتمنى..

santakarim said...

جميل
ومش مهم ايه سبب انه مينفعش، هى دايماٌ كده ، الأول ما تنفعش وبعدين تلاقى 100 سبب

Ahmed Shokeir said...

و إحنا عالباب بصيتلي قوي.."إنتي هاتبقي عروسة زي القمر.. و أنا أول واحد يتبعت له دعوة الفرح..فاهمة؟"

لأ جنتل برده .. ولاد الناس برده ياجماعه

نوور ... إعذرينى إنتى عارفه أنا لازم أهرج

Nour said...

Merci ya Kareem..

Ama enta b2a ya Mr. A7mad.. fa mesh ha2olak 3'er

en el nas el style style wel nas ely mosh style mosh style :PPP :D

free soul said...

nour, that is so sweet and so beautiful :(

I saw something today that brought happieness to my soul, your text describe the opposite case but all deal in the same context, the marriage that is based on love or what ?

If you check the last post you will see the opposite case, this time in reality not in imagination

Well done, like usual , my sensitive friend :)

مريم said...

so beautiful ya Nour like all u write, and so sensitive with Fayrouz's most beautiful song "Wahdon"
even the sadness in it is so noble, but u know the sense of waste in it just kills me and makes me angry

Nour said...

free soul,
Thx a lot ya free soul.. I commented on the post u mentioned.. Mabrook ya sidi w 3o2balna kolena ya rub :)

Maryooma b2a :)
Thx ya gamila.. & I just want 2 tell u is that those feelings r mine exactly.. it just makes me feel how stupid ppl can sometimes get..

free soul said...

allah yebarek feeky :)

You love fairoz ? She is my favorite and have all her songs, at least almost ;)

johny bravo said...

I liked the story as it's so much realistic in the egyptian context.This confusion about friendship/love issue.The girl is cut between el 3aris el lo2ta who expressed a willingness to marry her and the friend who knows all about her but still keeps her as a friend.
In my opinion, it's not only him who doesnt know what to do, it's her also who is nt satisfied by just keeping him as a friend and thinks of el3aris at the same time.Both of them have confusion that is common in the egyptian society that defames the male/female relations.
Nice blog i must say,,simple and talented.will come regularly

أقواس said...

خيرا فعلت و تركت بطلي قصتك أحرار ..

Romantic Rose said...

بقي ده اسمه كلام يا نور .. اول مره اقرالك تبكيني ؟؟
و الله الحب ده ظلم و ماشي ف الدنيا ..
انا تخيلت الشكل و الاحساس الداخلي ليكي و ليه .. انتي عامله مش واخده بالك و هو بيجاريكي ف الدور ..
ليه الحب يضيع؟ و ليه الحب يتحبس داخل جدران من الصداقه المزيفه؟ و ليه البنت علشان وصلت 25 سنه يبقي اي وليد ليها فرصه لمجرد انه معجب بيها ولا بيحبها ؟؟

Aladdin said...

رداً على أسئلة روز.. ليس بظلم، وإنما نحن الذين نظلم أنفسنا. الحب والجبن ضدان لا يجتمعان، لابد للحب من شجاعة حتى لا ينتهي بشكل مأساوي (الظلم)!

الحب يضيع لأننا نريد أن نرضي الآخرين على حساب أنفسنا (ظلم)؟!

ليست صداقة مزيفة بس واحد من الطرفين جبان لا يمتلك الشجاعة الكافية للحب. (من هنا يأتيك إحساس الزيف)!

موضوع السن ده أكبر "ظلم" يوقعه علينا الآخرون (حتى الرجال لا يسلمون منه)!! الحل أيضاً في "الشجاعة" وليذهب الآخرون إلى الجحيم!!!!

Nour said...

free soul,
Yup, Fairouz is my favourite akeed ;)..

raghood,
Thx a lot dear.. Waiting 4 ur next visit ISA :)

أقواس
والله أنا حابة تنوع الآراء اللي أنا شايفاه ده
:)

Romantic Rose,

لو كنت أعرف كده مكنتش كتبتها
:'(

أسئلتك محورية يا روز.. بس الأهم الإجابة

و للأسف في الغالب بتبقى مفروضة علينا..

Aladdin,
؛؛
ليست صداقة مزيفة بس واحد من الطرفين جبان لا يمتلك الشجاعة الكافية للحب. (من هنا يأتيك إحساس الزيف)! ,,

So true bgad..

إحنا على طول السائد في المجتمع بيجبرنا نعمل حاجات إحنا بجد مكناش نتخيل في يوم إننا نقبل بيها.. و تمر الأيام و نفاجأ إن دي بقت حقيقتنا خلاص..

قليلين اللي بيقدروا يقاوموا و يظلوا "نفسهم" و بس..

wa7ed mn masr said...

نور :فى وسط زحمة السياسة ،فرحت إنى لقيت تانى بلوج جميل فى يومين ،كنت لسة من شوية باسمع " عينيك تحت القمر" و رجعت لقيت بلوجك ، بلوج جميل ، غنوة فيروز و الحدوتة الصغيرة اللى إنت كتباها عملوا جو خرجنى من كل سخافة اللى إحنا عايشين فيه دلوقتى تعرفى كنت و أنا راجع فى الطريق كنت بافكر أكتب تدوينة أطلب فيها من الوطن أجازة
بجد بلوج جميل ، إكتبى

Mr-Biboooo said...

انا عارف انى جيت متاخر

فى الظروف دى مبحبش اعلق لكن مش قادر امسك نفسى بصراحة
المشكلة انى مريت بتجربتين واحدة انتهت نهاية ماساوية شويه و هى التجربة الى اتحولت فيها من صديق لحبيب

اما التجربة المستمرة الان هى علاقتى بصديقة عزيزة لما قريت لبوست لقيت نفسى بسال اسئلة كتير كنت بدارى اجابتها

يالا مش مهم منك لله وخلاص

Nour said...

Wa7ed mn masr,

ميرسي بجد على كلامك الجميل.. دي حاجة تسعدني إني قدرت أخرجك من المود
:)

mr-biboooo,

مني لله ليه يا عم بس أنا عملتلك إيه
:D

Zeryab said...

الواقع يقتل الحب قبال أن نحياه ....
وصدقت إيف فيما قالته عن الصديق التخيلى

mindonna said...

عجبك كده يانور
كده تعصري قلبي ؟
;)

Nour said...

سلامة قلبك يا ميندونا
;)

taher said...

بتحصل يا نور بتحصل بالضبط

Anonymous said...

حلوة أوي..
بس نفسي النهاية تكون مختلفة..
اوي!